Марий калыкемлан
Шикшештмым ойлен йӱлем манын
Молан шкендым шке ондалет?
Улат кулжо курныж саманын,
Алят вӱраҥлалтын илет.
Шупшкедыл кок веке керемым
Вӱден коштыктат – тый келшет.
Тӧра сылнешташлан пайремжым
Йодеш муралташ – муралтет.
Пайрем ӱстембалне мо кодшым
Пуат тыланет – йывыртет.
Шеҥгеч коштыт тыйым шып воштыл,
А тый нунылан тауштет.
От керт мо вуетым нӧлталын,
От керт мо вачет виктарен?
Саклен кодаш поро лӱметым,
От керт мо кӱчет ончыктен?
Шикшештмым ойлен йӱлем манын,
От керт нигузе тый волгалт.
Марий калыкем, ир саманын
Молан лачак кулжо улат?
Шырган